ألف لا للعروبة ...

اسمحولي انا هنقول الموضوع ده بالعامية

مش باقي مني غير شوية امل صغير في عيوني أنا مش عايزه
لو كنت يوم هالمحك وأنتي بتوطي في معركة ما فيهاش ولا طيارات ولا جيش ما كنت عشت لليوم ده
الكل باعك يا مصر .. الكل باعك يا شعب مصر .. الكل تاجر بك وبمشاعرك وبحقوقك وأصبحنا الآن (ملطشة) للي عايز يلطش براحته.
إلى كل من كذب علينا وكل من خرج علينا في الفضائيات المصرية يصرخ ويولول ويعمل برنامج ويسميه "عايز حقي" .. انت فين ؟
إلى كل من ذهب للجزائر ليهدئ الأوضاع ويقول أنا الكل في الكل .. انت فين ؟
إلى كل من أجرى مداخلات تليفونية يبكي فيها على شعب مصر وكرامة مصر التي أهدرت .. انت فين ؟

يا اعضاء المنتدى الكرام نحن أمام أمرين كلاهما أمّر من الآخر .. إما أن يكون كل هؤلاء كاذبين وأن ما حدث في السودان كان مجرد احتكاكات عادية بين جماهير الفريقين وبالتالي فنحن الذين صنعنا الحدث وكبرناه وحضرنا العفريت ومش عارفين نصرفه، وإما أن كل هؤلاء شوية من المنافقين والمرتزقة الذين يعيثون في هذا الوطن فساداً، وكلهم سكتوا (بالأمر) وبالتالي فهم لا يستحقون أن نقول عليهم مجرد كلمة واحدة.

أين الدكتور مصطفى عبده، أين أحمد شوبير، أين عمرو أديب، أين خالد الغندور، أين مدحت شلبي، أين كل من حملوا لواء الدفاع عن شرف مصر .. أين شرف مصر أيها السادة ..؟

الأفنديا علاء وجمال مبارك.. لا والبشمهندس حسني مبارك كمان .. فين حقنا ..؟ إمتى هتعتذر الجزائر..؟ طيب هي هتعتذر من الأصل.؟
ولا هو المطلوب مننا اننا نعتذر للجزائر حكومة وشعباً ..؟!!!
شوف انا هنقولك حاجة لو كنت عايز كده احنا هنعملوه .. علشان وقتها هنكونوا عرفنا ان الغلط كان غلطنا من البداية وبالتالي فاحنا معندناش اي مانع خالص يا بشمهندس اننا نعتذر بس ياريت نعرف الحقيقة.

ممكن طلب يا سيادة المسئولين ؟ ممكن بس تقولوا لنا نعملوا ايه ؟
نسكت ؟
نتكلم ؟
نعترض ؟
نبكي ؟
نصرخ ؟
نقول اننا كاذبون ؟
نقول اننا مخطئون ؟
قولوا لنا ايه اللي المفروض نعمله بما انكم الحكومة (المصرية)

أيها السادة ... لم تستغلوا التفاف شعب كامل حول راية وطنه .. واكتفيتم بإعلانات (بايخة) تخص رفع العلم المصري .. قلنا إننا نريد أن يرفع العلم بالعمل .. أن نتحرك .. أن ننجز .. أن نتطور .. أن نستغل هذه الفرصة .. ولكن لم يستغلها أحد .. وضاع حقنا .. وضاعت سمعتنا .. وضاع منكم حماس شباب لا يقدر بثمن .. فمن نحاسب ..؟

قولوا لنا من نحاسب ؟
نحاسب أنفسنا ؟
نحاسبكم ؟
نحاسب الجزائر ؟
نحاسب الصامتون ؟
نحاسب الباكون أم المولولون ؟
نحاسب المنافقون .. أم المرتزقة ؟ قولوا لنا نحاسب من ..؟

يا بشمهندس حسني:

من مواطن مصري غلبان أوي صدقني وحياة مصر عندي يا شيخ .. انا لم أشعر بالإهانة كما شعرت الآن .. لم أشعر برخص ثمني كما شعرت الآن .. لم أشعر بأن بلدي تهان مثلما أشعر الآن .. لم أشعر بالحزن مثلما أشعر الآن .. أنا عاوزك تجيبلي حقي وحق مصر والمصريين يا بشمهندس (هتعرف ؟!!)
انا عن نفسي ومعايا ان شاء الله كل اللي بيحب مصر اللي انت بتحكمها ومش هنسيب الحق يروح وهنعرف ازاي نرجعه بس كل شئ في وقته ومفيش عروبة عندي تاني إلا لما حق مصر يرجع.
الموضوع مامتش زي أي (هوجة) بتيجي وتنتهي يا حسني المرة دي وحياتك انت ما هتعدي ولا هتهدى
ما حدث لم يكن مجرد مباراة كرة قدم .. بل كانت سبة في جبين كل مصري سواء كان الخطأ من عندنا أو الخطأ من عند الجزائريين ... ما حدث سبة في جبين وطن بأكمله سواء عن طريق الكاذبون أو المعتدون.

ياريت يا بشمهندس .. يا إما أنك تقول لنا ان اللي هللوا وبكوا وولولو كاذبون وتصدر أمراً بعقابهم لأنهم ضحكوا على بلد
أو تقول إنك مش هتسيب حقنا وهترجعه (بس ميكونش زي المرة اللي فاتت علشان خاطري)
وساعتها هنبقى عرفنا طريق الصفر % فين وقرار ورا قرار لصالح مصر هيبدأ تصويتنا ليك وتزيد النسبة لـ 1% وهكذا.
بلاش تخلينا نصوت عليك

تحياتي لكم

مع احترامي لكلامك يا استاذة بس انا مش بحب انظر لاي موضوع بنظرة تشائمية حتى لو كل الادلة بتقول عكس ده
كلنا بنحب بلدنا ومينفعش نقول لا مش هنجيب حقنا ومحدش هيرجعوا
لازم نحاول ونحاول لحد ما حقنا يرجع بالفعل
تحياتي لكِ

هو ده بالظبط اللي انا نفسي فيه واللي كتبت الموضوع علشانه
اننا نقول لا مش هنعدي الموضوع المرة دي
لازم نعمل حاجة اي حاجة مهما كانت بسيطة علشان البلد دي
نورت الموضوع يا اخي الفاضل
تحياتي لك